बनेपा- काभ्रेको बनेपा नगरस्तरीय अन्तर वडा मेयर कप फूटबल प्रतियोगिताको उपाधि बनेपा वडा नं ६ ले जितेको छ । सोमबार भएको फाइनल खेलमा वडा नं १४ लाई १–० ले पराजित गर्दै वडा नं ६ ले उपाधी जितेको हो । वडा नं ६ का लागि निर्णायक गोल पारस नेपालले गरेका थिए । उनी फाइनल खेलको म्यान अफ दि म्याचसमेत चुनिए । उपाधिसँगै वडा नं ६ ले नगद १ लाख ५ हजार पनि प्राप्त गरेको छ ।
यस्तै उपविजेता बनेको वडा नं १४ ले नगद ५५ हजार रुपैयाँ प्राप्त गरेको छ । प्रतियोगितामा बेस्ट प्लेयरको उपाधी वडा नं १४ का विरेन्द्र थापाले प्राप्त गरे भने बेस्ट डिफेन्सको उपाधी वडा नं ११ का प्रभात बोगटी, बेष्ट मिडफिल्डर वडा नं ९ का पुनम आलेमगर, इमर्जिङ प्लेयर वडा नं ६ का फूमी केसी र बेस्ट किपरको उपाधी वडा नं ६ कै सौगात खत्रीले प्राप्त गरे । यस्तै हाइस्कोररको पुरस्कार रोहन शाही र सुजल राजबाहकले प्राप्त गरे । दुबैले प्रतियोगितामा २–२ गोल गरेका थिए ।
अघिल्लो पटकको उपाधी विजेता वडा नं ९ को आयोजनामा भएको प्रतियोगिताको अर्को संस्करण हालको विजेता वडा नं ६ ले गर्ने छ । प्रतियोगिताका विजयी टिम, खेलाडी र प्रशिक्षकलाई नगर प्रमुख शान्तिरत्न शाक्य, उपप्रमुख बिमला सापकोटा र वडा नं ९ की कार्यवाहक वडा अध्यक्ष मनिषा तामाङले ट्रफी, मेडल र प्रमाणपत्र प्रदान गरेका थिए ।
प्रतियोगितालाई बनेपा फूटबल एकेडेमी, बनेपा पोलिटेक्निक फूटबल मैदान संरक्षण उपभोक्ता समिती, काभ्रे जिल्ला फूटबल संघ, माउन्ट एभरेष्ट फूटबल क्लव, शिर मेमोरियल अस्पताल लगायतले प्राविधिक सहयोग गरेका थिए ।
